KRYEFAQJA » LAJME » Volejboll, Delmati, mysafir i veçantë i kombëtares shqiptare

Volejboll, Delmati, mysafir i veçantë i kombëtares shqiptare

Kombëtarja kuqezi e volejbollit të femrave ka patur gjatë këtyre ditëve një mysafir të veçantë, Davide Delmatin, trajnerin e LMP Mondovisë, skuadrës italiane ku ka milituar pëgjatë dy sezoneve të fundit edhe shqiptarja Erblira Bici.
“Jam këtu i ftuar nga stafi i përfaqësueses shqiptare për të ndjekur disa seanca stërvitore, por edhe për të parë Erblira Bicin, që ka luajtur me ne sezonin që sapo u mbyll. Është një përvojë zbavitëse dhe po shoh që skuadra po stërvitet me seriozitet për ndeshjet e saj”, tha Delmati për Rrjetin e Radio-Televizionit Shqipar.
Ai theksoi se nuk është çuditur nga loja e volejbollistes shqiptare gjatë sezonit që sapo u mbyll. “Po e prisja, sepse edhe sezonin e saj të parë tek ne ka luajtur shumë mirë. Këtë sezon është rritur edhe më tepër në lojën e saj, ndërsa kemi bërë një kampionat mjaft të mirë, duke shkuar edhe në finale të Kupës. Era ka qenë padyshim vendimtare në këtë sezon që kemi bërë, por është pjekur edhe në planin personal. Për mua është një lojtare që ka ende shumë për të dhënë dhe që mund të shkojë shpejt edhe në Serinë A1” shprehet Davide Delmatin, trajneri i LMP Mondovisë.
Trajneri italian mendon se skuadra e tij arriti maksimumin, pavarsisht se nuk u ngjit dot në nivelin më të lartë të volejbollit italian. “Po, humbëm dhe nuk shkuam dot deri në fund. Por për mua skuadra nuk ka asnjë arsye për vajtuar, sepse patëm shumë dëmtime në fazën finale dhe kjo na dënoi në fund. Nuk ishim nisur në fillim të sezonit me synimin për të shkuar në A1, kështu që vajzat kanë bërë shumë mirë dhe mua më ka mundësuar klubi që të bëjmë një punë të mirë” tha Delmati.
Ndërsa për vetë Bicin, kjo vizitë ishte një surprizë e këndshme nga një trajner që e ka ndihmuar atë të rritet profesionalisht.

Sicred