KRYEFAQJA » LAJME » Bota » Ura Morandi, ende nuk gjenden 16 persona

Ura Morandi, ende nuk gjenden 16 persona

Nën gërmadhat e urës Morandi të Genovas vazhdojnë gërmimet. Për të dytën natë rresht ekipet e kërkim-shpëtimit kanë punuar për gjetjen e personave që ende rezultojnë të zhdukur. Sipas Drejtorisë kombëtare të Mbrojtjes Civile janë ende 16 persona që nuk u janë përgjigjur apelit të familjarëve e që supozohet të ndodhen nën gërmadhat e urës së shembur. Gërmimet janë përqëndruar në zonën pranë hekurudhës në anën e majtë të lumit. Por bilanci vazhdon të mbetet provizor i një dite më parë, 39 viktima të identifikuara, 2 viktima të paidentifikuara, 16 të plagosur, 9 prej të cilëve në gjëndje të rëndë.
Kryetari i Bashkisë së Genova ka informuar se ditën e shtunë më 18 gusht do të zhvillohet ceremonia e shtetit për varrimin e viktimave të urës Morandi ku pritet të jenë të pranishëm autoritetet më të larta të shtetit italian.
Ndërkohë rritet dhe numri i banorëve të evakuar nga territori pranë tragjedisë. Janë mbi 632 persona e mbi 300 familje të larguar nga banesat e tyre për motive sigurie. Pas shëmbjes së urës i gjithë territori përreth është në rrezik banimi. Kryeministri i Italisë, Giuseppe Conte shpalli gjendjen e jashtëzakonshme për një periudhë prej 12 muajsh në rajonin e Ligurias, si kundërpërgjigje ndaj shembjes së ures. Ai tha gjithashtu se do të akordojë 5 milionë euro shtesë nga fondet qendrore, për t’ia dhuruar këtij rajoni.
Ende nuk është bërë i ditur shkaku i shembjes së urës, por debatet në vend janë ndezur në lidhje me kushtet e sigurisë së rrugëve, apo edhe urave të tjera në vend. Zemërimi është i madh edhe me kompaninë që merrej me mirëmbajtjen e urës së shembur. Autoritetet kanë nisur hetimet për vrasje të mundshme nga neglizhenca.