KRYEFAQJA » LAJME » Bota » Trump bllokon dokumentin e demokratëve

Trump bllokon dokumentin e demokratëve

Donald Trump ka bllokuar dokumentin demokrat që kundërshton memon republikane me pretendimin se Presidenti aty paragjykohet në lidhje me hetimin e FBI-së në çështjen ruse. Shtëpia e Bardhë njoftoi se shefi i saj nuk mundi të deklasifikojë shkresën për shkak të “disa paragrafëve të ndjeshëm” që krijojnë “shqetësime për sigurinë kombëtare”. Një panel i Kongresit këtë javë votoi njëzëri për publikimin e dokumentit, për të cilin demokratët thonë se përmban korrigjime ndaj gabimeve dhe të pathënave të draftit republikan. Javën e kaluar, Trump i sfidoi paralajmërimet e Byrosë Federale të Hetimit ndaj nxjerrjes së memos republikane që pretendonte se agjencia kishte abuzuar me pushtetin e saj duke hetuar një këshilltar të Presidentit si pjesë e hetimit të tij ndaj ndërhyrjes së Rusisë në zgjedhjet presidenciale të vitit 2016. Demokratët këmbëngulin se dokumenti i ka mbledhur informacionet sipas dëshirës dhe se është çorientues. Në fillim të javës, Komiteti i Inteligjencës në Dhomën e Përfaqësuesve votoi unanimisht për deklasifikimin e memos demokratike prej 10 faqesh, që synonte balancimin e asaj republikane.

Sicred