KRYEFAQJA » LAJME » Bota » Tokio, përurohet Pallati i ri 10,000-vendësh i Sportit

Tokio, përurohet Pallati i ri 10,000-vendësh i Sportit

Në Tokio është përuruar të shtunën mjedisi i parë, nga 8 të tillë, ku do të mbahen Lojërat Olimpike të 2020-ës. Ky është një lajm i mirë për vendin organizator që është akuzuar shpesh për vonesa në përgatitjet për festivalin më të madh sportiv në planet. Pallati i Sportit i Pyllit “Musashino” do të presë garat e badmintonit dhe pentatlonit modern, si dhe të ndeshjet e basketbollit me karrige me rrota të Lojërave Paralimpike. “Ne po bëjmë përpara me përgatitjet tona dhe e kemi kapërcyer tanimë afatin e 1,000 ditëve të mbetura dhe shpresojmë ta ruajmë ritmin dhe të punojmë fort”, – deklaroi Guvernatorja e Tokios, Juriko Koike, duke folur gjatë ceremonisë së përurimit. Salla kryesore ka një kapacitet prej 10,000 ndenjësesh për spektatorët dhe përfshin një pishinë, një palestë, një mjedis të përdorshëm për shumë sporte dhe dy salla “fitness”-i që janë në dispozicion të publikut. Panelet diellorë në tarracë dhe të tjera pajisje të fjalës së fundit të teknologjisë do të ndihmojnë në uljen e sasisë së lëshimit të karbonit në atmosferë. Edhe projektimi mbi bazën e udhëzimeve të “Tokio 2020”, i mundëson këti pallati sporti të qenit lehtësisht i përdorshëm për të gjitha moshat, por edhe për njerëzit me aftësi të kufizuara fizike, mendore apo edhe të shikimit. Salla kryesore ka hapësirë për karrige me rrota dhe ndenjëset janë vendosur mjaftueshëm larg njëra-tjetrës që të gjithë të kenë shikim të pastër edhe nëse njerëzit në rreshtin përpara ngrihen në këmbë. Ndërkohë që Tokio ka marrë masa të suksesshme për të ulur koston e Lojërave, Komiteti Olimpik Ndërkombëtar i ka bërë thirrje Komitetit organizator që ta ulë edhe më tepër buxhetin e parashikuar prej 12 miliardë dollarësh. Tokio do të ketë gjithsej 39 mjedise sportive për Lojërat Olimpike dhe Paralimpike të 2020-ës, përfshi 23 ekzistuese dhe 8 të përkohshme, të cilave u shtohen edhe 8 mjedise të reja.

Sicred