KRYEFAQJA » LAJME » PARTIZANI I GEGËS, PËRFORCIMET QË NDIKOJNË FORMACIONIN

PARTIZANI I GEGËS, PËRFORCIMET QË NDIKOJNË FORMACIONIN

Janë vetëm dy javë që nga nisja e sezonit të ri të Kategorisë Superiore dhe natyrshëm që është shumë herët për të krijuar një ide e aq më tepër për të gjykuar mbi skuadra të caktuara. Por ajo që mund të themi është se, duke gjykuar mbi afrimet dhe largimet në merkaton e verës, mund të krijojmë një ide nga ajo që skuadrat presin këtë sezon. Kështu, për shembull, në rastin e Partizanit, janë plot 11 lojtarë të rinj që kanë zgjedhur të veshin fanellën e kuqe, apo thënë ndryshe, trajneri Gega ka rinovuar afro 40% të skuadrës. Kjo listë përfshin edhe Bruno Telushin dhe brazilianin Lukash Kardozo, që kthehen në fushë për Partizanin pas mungesave afatgjata për shkak të dëmtimeve, por edhe shqiptarin nga Maqedonia, Egzon Belica, i cili erdhi në janar të këtij viti në kryeqytetin shqiptar. Në dy ndeshjet e para, vetëm Ardit Hila i ardhur nga Teuta, ganezi Emanuel Mensah i ardhur nga Kerkira në Greqi, por edhe shkodrani Rubin Hebaj kanë zënë vend në formacionin e Gegës në këto dy javë të para. Natyrisht, në këtë fillimsezon asgjë nuk është fikse dhe, nëse në formacionin e javës së parë përballë Skënderbeut, trajneri e tërhoqi Trashin prapa në të majtë të mbrojtjes, dhe e la në stol Mensanë në favor të Asanit, në ndeshjen e një jave më pas në Kamëz, Gega e bëri këtë rotacion në favor të ganezit. Progni, i cili e nisi nga stoli fitoren me Kamzën, duke i lënë vendin Trashit, i dha një tjetër impuls Partizanit kur u fut në fushë pas një ore lojë, duke zëvendësuar Hebajn që ende nuk po e gjen ritmin dhe golat. Pritshmëritë janë të mëdha për 20-vjeçarin e huazuar nga Domzhale, por duket se ai ka ende nevojë për kohë, ndërsa trajneri Gega duket se shpreson edhe një alternativë tjetër në sulm në këto 2-3 ditët e fundit të mbetura në merkaton e lojtarëve. Megjithatë, përtej përforcimeve dhe improvizimeve të momentit, duke e marrë të mirëqenë një skemë loje 4-3-3 që shndërrohet shpesh në 4-5-1, Partizani i Gegës e ka krijuar tanimë pak shumë fizionominë e tij dhe, para Alban Hoxhës në portë vendosen Kalari dhe Ibrahimi në krahët përkatës, dhe Atanda e Belica në qendër. Përpara tyre në mesfushë vendoset Telushi në rolin e digës së parë për sulmet e kundërshtarit, ndërsa ai ndihmohet në krahët nga Hila dhe Mala. Në rastet kur kërkohet më tepër fantazi në sulm, Hila i lë vendin Bardhit, ashtu sikundër ndërrojnë vendet Trashi me Prognin, me këtë të fundit që luan edhe rolin e “xholit”, duke u aktivizuar edhe në sulm, ndërsa Asani në të majtë ndërron vendin me Mensanë, ashtu sikundër do të shihet edhe në javët në vijim nëse Kardozo do të alternohet me Hebajn.

Sicred