Muzeu Historik Kombëtar feston 35 vjetorin e hapjes për publikun

35 vite më parë hapi dyert Muzeu Historik Kombëtar. Studiues dhe historianë janë bërë bashkë jo vetëm për të kujtuar atë moment, por edhe për të diskutuar mbi “Rolin e muzeve në një shoqëri moderne”. Aktualisht muzeu kombëtar përmban rreth 6200 objekte, të cilat i përkasin një periudhe relativisht të gjatë kohore, duke filluar nga mijëvjeçari IV para Krishtit dhe deri në gjysmën e dytë të shekullit XX. Ai ka shtatë pavjone: Lashtësia, Mesjeta, Ikonografia, Rilindja Kombëtare, Pavarësia, Lufta Antifashiste Nacionalçlirimtare dhe Persekutimi komunist. Sipas drejtorit Melsi Labi, etnokultura shqiptare është në proçes ndërtimi.

Ndërtesa e Muzeut është mbështetur në modelin e arkitekturës monumentale. Grupi i punës, që punoi për projektin e Muzeut Historik Kombëtar përbëhej nga arkitektët Sokrat Mosko, Enver Faja, Nina Shehu dhe Petraq Kolevica. Në ballinën kryesore të Muzeut Historik Kombëtar është mozaiku “Shqipëria”, i përbërë nga 13 figurina . Ai është realizuar nga Vilson Kilica, Met Deliu, Agim Nebiu, Josif Drobroniku, Aleksandër Filipi etj.