KRYEFAQJA » LAJME » Krimi në vend, maxhoranca dhe opozita përplasen në distancë
Parlament, maxhoranca në sallë opozita në Elbasan

Krimi në vend, maxhoranca dhe opozita përplasen në distancë

Maxhoranca dhe opozita kanë regjistruar sot replika të ashpra në distancë lidhur me gjendjen e krimit në vend. Në ditën e parë të nisjes së punimeve të sesionit parlamentar të vjeshtës, maxhoranca ishte e pranishme në sallë, ndërsa opozita në momentet e fundit zgjodhi të mblidhej në Shkodër, qyteti ku ngjarjet kriminale po shqetësojnë jo vetëm opinionin e atjeshëm.
Në parlament numri dy i socialistëve dhe kreu i Grupit Parlamentar Taulant Balla, tha se shifrat tregojnë qartë se situata e rendit dhe krimit në vend dhe gjithashtu edhe në Shkodër është përmirësuar. “Dy grupet e opozitës janë në Shkodër për të zhvilluar një takim për rendin publik. Shifrat tregojnë se në vitin 2010, kur Basha ishte ministër i Brendshëm, kishim 18 vrasje vetëm në Qarkun Shkodër, krahasuar me një shifër prej 8 vrasje gjatë tetëmujorit të parë të vitit 2018” tha zoti Balla. “Ata që kanë kryer atë krim duhen ndëshkuar menjëherë dhe kemi besim të puna e Policisë së Shtetit dhe të vullneti i ministrit të Brendshëm. Duam që këto të dhëna kuptimplota të vërtetohen nga mediat, e jo të hidhet te qytetarët helmi i çorbës së SHQUP-it” shtoi zoti Balla.
Ndërkaq në Shkodër zhvilloi një mbledhje të jashtëzakonshme. Kreu i Partisë Demokratike, Lulzim Basha, tha se në më pak se 3 muaj kanë ndodhur 6 vrasje mafioze dhe janë rrëmbyer 2 persona. “Këtu duhet të ishte Kryeministri, jo për të shitur mend dhe për të bërë batuta, por për të raportuar arrestimin e kriminelëve që kanë 6 muaj që terrorizojnë Shkodrën” tha ai. Zoti Basha akuzoi zotin Rama se bashkëpunon haptazi me familjen kriminale Bajraj, që ka kthyer Dobraçin në zonë lufte. “Një lagje e Shkodrës e vënë nën kontroll nga bandat. Shteti është ulur në gjunjë te krimi. Rama-Xhafaj janë kryeministër dhe ministër në letër, por kontrollin e shtetit e kanë bandat. Ky është realiteti në Shkodër, Vlorë, Fier, Durrës dhe Shijak” tha zoti Basha.
Zhvillimet e sotme duket se paralajmërojnë një stinë të nxehtë në politikën shqiptare, ndonëse ndërkombëtarët u kanë bërë thirrje palëve për bashkëpunim në arritjen e objektivave për çeljen e negociatave vitin e ardhshëm.

[

Sicred