KRYEFAQJA » LAJME » Bota » I nxehti vdekjeprurës në Kanada

I nxehti vdekjeprurës në Kanada

33 persona kanë humbur jetën si pasojë e një vale të nxehti që ka mbërthyer pjesën jugore të provincës kanadeze Quebec. Moti i nxehtë nisi të premten e shkuar me temperatura që shkuan në 35 gradë celsius dhe lagështi të lartë. Numri i viktimave është rritur çdo ditë, këtë javë, me 17 vdekje në total të raportuara deri të mërkurën dhe 33 të regjistruara të enjten. Vala e të nxehtit është më e rënda që provinca ka përjetuar në dekada. Zyrtarët i kërkojnë njerëzve të pinë ujë me shumicë dhe të qëndrojnë në hije. “Po bëjmë gjithçka që mundemi”, tha kryebashkiakia e Montrealit, Valerie Plante. Qyteti ka hapur pishinat dhe hapësirat me ajër të kondicionuar për publikun. Kryebashkiakia tha se skuadrat e reagimit të shpejtë kanë nisur të shkojnë derë më derë, për të kontrolluar rreth 15 mijë banorë. Deri më tani, 12 nga 33 viktimat, janë regjistruar në Montreal, qytetin me popullatën më të madhe në provincë. Vala e të nxehtit mund të jetë veçanërisht vdekjeprurëse për të miturit dhe të moshuarit, thanë zyrtarët e shëndetit publik. E sipas tyre, viktimat e regjistruara nuk kishin pasur ajër të kondicionuar. Temperaturat mesatare në Montreal, në këtë periudhë të vitit, janë zakonisht 25 gradë celsius.

Sicred