Hyjnë në fuqi ndryshimet në Kodin Rrugor

Nga 21 janari ka hyrë në fuqi disa ndryshime të rëndësishme në Kodin Rrugor të Shqipërisë. Sipas tyre rriten në një shkallë më të lartë ndëshkimet për shkelësit e këtij kodi. Me këtë rast ministri Edmond Haxhinasto u bëri thirrje drejtuesve të mjeteve që të lexojnë me kujdes dispozitat e këtij kodi. “Sot fillojnë efektet e kodit rrugor. Dhe masat e kodit do të kenë impakt të drejtëpërdrejtë për rritjen e sigurisë në shërbimin e transportin publik dhe në transportet e tjera. Ju bëj thirrje drejtuesve të mjeteve të lexojnë me kujdes ato dispozita që janë miratuar në kod, sidomos ato që kanë të bëjnë me sigurinë” tha zoti Haxhinasto.
Ndryshimet e fundit në Kodin Rrugor kanë synuar minimizimin e numrit të aksidenteve në Shqipëri. Sipas të dhënave në 20 vitet e fundit në Shqipëri kanë ndodhur 7000 mijë aksidente automobilistike. Çdo vit në këto aksidente humbin jetën rreth 260 persona. Shumë analistë i konsiderojnë shifrat si bilance lufte. Shkaqet kryesore të aksidenteve në Shqipëri janë shtimi i qarkullimit të automjeteve, tejkalimi i shpejtësisë dhe mosrespektimi i rregullave në rrugë si nga shoferët ashtu edhe nga këmbësorët, përdorimi i pijeve alkolike etj.