Fino dorëhiqet nga PS: Dua të evitoj çdo paragjykim, për një garë të drejtë dhe të ndershme në FSHF

Deputeti socialist Bashkim Fino ka dhënë dorëheqjen nga të gjitha funksionet partiake, pasi garon për postin e presidentit të FSHF. Zoti Fino i cili është sekretari organizativ dhe administrativ i PS shkruan në Fejsbuk se “Ky akt, vjen për të evituar çdo paragjykim, për një garë të drejtë dhe të ndershme, në kuadër të kandidimit tim për postin e presidentit të FSHF”.
Javën e kaluar në “Rubrikën Sportive” në RTSH zoti Fino bëri publike ambicjen e tij për postin e kreut të FSHF si dhe paraqiti platformën. “Nëse zgjidhem në krye të FSHF deklaroj se 24 orë në ditë do t’ja kushtoj futbollit” tha ai.
Kandidatura e zotit Fino ka shtuar spekulimet se PS dhe kryeministri Rama po synojnë të vënë nën kontroll edhe futbollin, pavarësisht se kreu aktual i FSHF Armand Duka ka rikandiduar dhe po kërkon mandatin e pestë. Por sot zoti Rama deklaroi se nuk ndërhyn në garën për kreun e kësaj federate, ndërsa mori pjesë në inagurimin e ndërtimit të zyrave të reja të saj.