KRYEFAQJA » LAJME » Kulturë » Dokumentar për këngëtarin Arif Vladi, “simbol lirie dhe bashkimi”

Dokumentar për këngëtarin Arif Vladi, “simbol lirie dhe bashkimi”

Projekti më i ri i Radiotelevizionit të Kosovës, filmi dokumentar, “Zëri i këngëve lapidare”, u shfaq në Tiranë në sallën e mbushur plotë në Muzeun Historik Kombëtar. Autorët e filmit, Ilir Shaqiri, gazetari Besart Galica dhe regjisori Blerdi Malushi, në këtë dokumentar sjellin për shikuesin jetën dhe krijimtarinë artistike të Arif Vladit, i cilësuar “simbol lirie dhe bashkimi”. “Mesazhi që përcjelli interpretimi ishte shumë domethënës posaqërisht për rininë kosovare e cila kishte marrë përsipër kundërshtimin gjithë popullor të pushtuesve ” tha Ismet Bexheti Drejtor i Bordit të RTK-së. Ndërsa studiuesi Shyqri Galica tha se “ Arif Vladi u bë emër i shquar këtej e tej atdheut që në paraqitjet e para të tij për të shpërthyer denjësisht në kauzen e tij jetësore madje për të qënë prej anëtarëve të luftës së lavdishme çlirimtare të kosovës”. Publiku në sallë disa herë ka duartrokitur episodet në këtë dokumentar, që rrallë herë ndodh në veprimtari të tilla. Autorët kanë spikatur interpretimet më emblematike të Vladit, i cili me këngën e tij epike-historike mbetet i veçantë në artin muzikor shqiptar. “Ilir Shaqiri diti ta vejë jetën time ta hedhë në ktë dokumentar. Jam mirënjohës pasi nëpërmjet këtij dokumentari ka Lurën, ka Dibrën, ka babën tim e familjen time” u shpreh mes emocionesh këngëtari i mirënjohur Arif Vladi. Pas premierës në Tiranë, dokumentari, “Zëri i këngëve lapidare” do të shfaqet edhe në vendlindjen e Arif Vladit në Peshkopi të Dibrës dhe më pas në Prishtinë.