KRYEFAQJA » LAJME » Ambasada e SHBA mirëpret krijimin e KLP dhe KLGJ
Ambasada e SHBA mirëpret krijimin e KLP dhe KLGJ

Ambasada e SHBA mirëpret krijimin e KLP dhe KLGJ

Ambasada e Shteteve të Bashkuara të Amerikës në Tiranë reagoi pozitivisht lidhur me krijimin e Këshillit të Lartë të Prokurorisë dhe Këshillit të Lartë Gjyqësor. “Ne përgëzojmë prokurorët dhe gjykatësit që morën pjesë në votim për kurajon e tyre dhe që zgjodhën të ndryshojnë historinë e Shqipërisë” vlerëson në një deklaratë ambasada. Sipas saj “Krijimi i Këshillave shënon një hap vendimtar në zbatimin e Reformës në Drejtësi të Shqipërisë, e cila zëvendëson një sistem të prishur me një sistem me integritet, i cili përmbush dhe u shërben nevojave të qytetarëve shqiptarë” .
Në deklaratën e Ambasadës së SHBA çmohet se Këshilli i Lartë Gjyqësor dhe Këshilli i Lartë i Prokurorisë janë dy shtyllat e një sistemi gjyqësor të pavarur dhe cilësor. Ambasada e SHBA e cila ka kontribuar fort në Reformën në Drejtësi, nënvizon se “Ngritja e Këshillit të Lartë të Prokurorisë do të mundësojë tani krijimin e Strukturës Speciale Kundër Korrupsionit dhe Krimit të Organizuar dhe Byrosë Kombëtare të Hetimit, si edhe zgjedhjen e Prokurorit të Përgjithshëm të përhershëm. Këto institucione të drejtësisë janë të gjithë gurë të rëndësishëm në ndërtimin e shtëpisë së drejtësisë”.
Ambasada e SHBA në Tiranë shënon se “Aktorët kombëtarë duhet tani të konsolidojnë këtë përparim të reformës në drejtësi, përfshirë edhe nëpërmjet rekrutimit dhe emërimit të magjistratëve të rinj, gjë që është vendimtare për funksionimin e gjyqësorit”. “Një gjyqësor i fortë dhe i pavarur është kritik për të sjellë për popullin shqiptar rezultate në luftën kundër krimit të organizuar dhe korrupsionit.
Shtetet e Bashkuara mbeten plotësisht të angazhuara në mbështetjen e Shqipërisë për ndërtimin e një sistemi gjyqësor të pavarur dhe cilësor, i cili sjell drejtësinë për të gjithë qytetarët shqiptarë” shprehet ambasada.

Sicred